ՏԱՃԱՐ, կրոնական ծեսերին և արարողություններին ծառայող պաշտամունքային շինություն:
![Գառնիի հեթանոսական տաճար](http://www.armenianreligion.am/cms/image.php?image=http://www.armenianreligion.am/content_images/image/%D4%BF%D6%80%D5%B8%D5%B6%D5%AB%20%D5%B0%D5%A1%D5%B6%D6%80%D5%A1%D5%A3%D5%AB%D5%BF%D5%A1%D6%80%D5%A1%D5%B6/%D5%8F%D5%B8%D5%B6%D5%A5%D6%80/garni.jpg&width=150&height=225)
Հայաստանում քրիստոնեության ընդունման և տարածման
ժամանակ (IV դ.) հեթանոսական Տաճարները հիմնականում ոչնչացվել կամ վերափոխվել են՝ հարմարեցվելով կրոնական նոր գաղափարախոսության գործառնական և գեղագիտական պահանջներին: Քրիստոնեական Տաճարներն իրենց հատակագծային և ծավալատարածական լուծումներով էապես տարբերվում են հեթանոսականներից,որոնց հորինվածքը թեպետ մերժվել, սակայն անվանումն անցել է նոր կրոնի մոնումենտալ շենքերին: Քրիստոնեական Տաճարի, ինչպես ընդհանրապես եկեղեցու, պարտադիր բաղադրիչներն են աղոթասրահը, արլ. կողմում՝ Ավագ խորանը՝ բեմի և դասի հետ: Համընդհանուր ճանաչման են արժանացել Հռոմի Ս. Պետրոսի, Կոստանդնուպոլսի Ս. Սոֆիայի, Փարիզի Աստվածամոր, Կիևի Ս. Սոֆիայի, Մոսկվայի Վասիլի Երանելու և այլ Տաճարները: Տաճարները, մեծ մասամբ կառուցված լինելով քաղաքային և վանքային համալիրներում, ունեցել են քաղաքաշինական կարևոր նշանակություն՝ առանձնացել իրենց դիրքով, չափերով, նորարար լուծումներով, արտահայտիչ կերպարով: Հայաստանում Տաճար են անվանվել Մայր եկեղեցիները: Հայկական միջնադարյան Տաճարները (Էջմիածնի Մայր տաճար, Զվարթնոց տաճար, Անիի Մայր տաճար) վառ արտահայտված ազգային ինքնատիպությամբ, մտահղացման համարձակությամբ, գեղ. բարձր հատկանիշներով քրիստոնեական պաշտամունքային ճարտարապետության լավագույն նմուշներից են (տես նաև Եկեղեցի):
Շախկյան Գ.
Աղբյուրը՝ «Քրիստոնյա Հայաստան» հանրագիտարան, գլխ. խմբ. Հովհ. Այվազյան, Հայկական հանրագիտարան հրատ., Երևան, 2002, էջ 1000-1001:
![](http://www.armenianreligion-am.armin.am//cms/image.php?image=http://www.armenianreligion-am.armin.am/images/menus/315/82-83 [Converted].jpg&width=50)
Ալեք Մանուկյան 1,
ԵՊՀ 2-րդ մասնաշենք,
5-րդ հարկ,
Հեռ.` + 37460 71-00-92
Էլ-փոստ` info@armin.am
Բոլոր իրավունքները պաշտպանված են: Կայքի նյութերի մասնակի կամ ամբողջական օգտագործման, մեջբերումների կատարման դեպքում հղումը պարտադիր է` http://www.armenianreligion.am