Շնորհանդեսին բացման խոսքով հանդես եկավ ԵՊՀ ռեկտոր Արամ Սիմոնյանը. «Գրքերի հեղինակ Հակոբ Սրբազանը մեր եկեղեցում հայտնի է ոչ միայն որպես եկեղեցական բարձր դասի գործիչ, այլև որպես գիտնական, աստվածաբան, մարդ, ով գիտի գիտական աշխատանքի համը: Մարդ, ում աշխատությունները մեծ արժեք են ներկայացնում բոլորիս համար»:
Հավելենք, որ «Հավատի և բանականության հետքերով» գիրքը նվիրվում է Գևորգյան հոգևոր ճեմարանի հիմնադրման 140-ամյակին, իսկ մյուսը՝ «Մարտին Լութեր. մի բարեպաշտ վանականի ըմբոստությունը»՝ Հայոց ցեղասպանության զոհերի հիշատակին:
ԵՊՀ աստվածաբանության ֆակուլտետի դեկան Անուշավան եպիսկոպոս Ժամկոչյանը նշեց, որ միջոցառումը շատ կարևոր է ողջ ակադեմիական հանրության համար, ովքեր հետաքրքված են աստվածաբանական և կրոնագիտական հիմնախնդիրներով: Ժամկոչյանի խոսքով հեղինակն առաջին գրքում փորձել է վեր հանել ընդհանրական եկեղեցու հավատքի, բանականության փոխհարաբերությունների հիմնախնդիրները, իսկ երկրորդ գրքում հեղինակը գիտական անաչառությամբ վերլուծում է լյութերականության կրոնադավանական առանձնահատկությունները:
Այնուհետև գրքի հեղինակը՝ Հակոբ արքեպիսկոպոս Գլնճյանը, շնորհակալություն հայտնեց երկու գրքերի մեկենասին՝ Գրիգոր Մովսիսյանին, նրա տիկնոջը Նաիրա Կարապետյանին, Անուշավան եպիսկոպոս Ժամկոչյանին:
«Անահիտ» հրատարակչության տնօրեն Արտակ Ոսկանյանն էլ իր հերթին երախտիքի խոսք հայտնեց հեղինակներին, նման գիտական և արժեքավոր աշխատությունների համար:
Շնորհանդեսի ավարտին գրքերի հեղինակներին ԵՊՀ ռեկտոր Արամ Սիմոնյանը պարգևատրեց ԵՊՀ հուշամեդալով: